MUSALI ya zibahala ahulu ka pisinisi mwa tolopo ya Rundu na konile kuamuhela pene ye likana N$30 000 la bulalu biki ye felile kasamulaho mun`a siteshini sa mafula a oli sesi zibahala ka Engen mwa tolopo Rundu, a lifa pene yani ku musali ka nzila ya kuikupela maiswalelo ni kumufoseza habutuku.

Mun`a siteshini sa Engen kubeya babeleki ba hae, neba kile ba fapeleza musali kuli na sika lifa kasamulaho a mano feza kunwisa motikala ya hae ye tuna kono ka maniti yena musali na konile kulifa.
Musali na zibahalizwe ka libizo la Agnes Iita.

“Neni ile kuyo nwisa motikala yaka biki ye felile. Na mano feza kunwisa motikala, na ni munyanaka nelu konile kulifa tifo ya mafula a oli ene lu konile kunwisa ili pene ye likanaN$2404.95 sina kamo kun`olezwi fa kapampili ka. Na mano feza kunwisa, neni kile na bulelela mukwaezi wa simbayambaya kuli a kone kuya kakuli luna nelu libelezi ka pampili kaka supeza kuli ka niti lu lifile. Yene ni kile na tambeka mashelen`i na ile mwahala sintolo inge a sika bala mashelen`I ni kukuta ku luna kuli ne kushota N$1000,” ne kubulezi Iita.

Hane ba ika kuya kuli ba kone kumatisa motikala ya bona, babeleki ba Engen neba kile ba kwala nzila.

“Neni sabile ahulu kakuli neni hupula kuli batu ba bata ni nata. Neba kile balu swala ka nzila ye maswe ahulu fa mibili ya luna. Ka litohonolo, mun`a sintolo na konile kuya mwa sintolo ni kuyo buha mazimumwangala kuamana ni simpangaliko kaufeela ni kufumana kuli kanti babeleki ba hae ki bene ba fosize kakuli neba sika bala hande mali,” na tiiselize.

Baken`I sa kuli ne kuzuhile kanyi, Iita na kile a bulela kuli na swabile ahulu kakuli mwanako ye swana hape neba kilwe ba tamiwa ili nto yene tisize kuli, kakuli yena na sika fosa, a kone kubata pene ye likana N$100 000 ya ku mufoseza ni kumuswabisisa hala batu.
Pene kakuya ka yena kiya kulifa mulatu kakuli yena na sika fosa ni kuli simpangaliko kaufeela nesi kile sa musinya libizo.

Nihaike babeleki baban`wi neba kile baya kwa sibaka sa hae Iita kuyo ikupela maiswalela, Iita yena na bona feela kuli kuba lifisa ‘mulatu’ ki yona nzila ye tokwahala kubona.

Nihaikenge yena Iita na bata N$100 000, kupo ya hae ne konilwe kulilimaniswa ni kuikutisa fa N$50 000 mane haisi fa N$30 000.
Mun`a Engen, Jaco van Dyk na swabile ahulu kuli mafosisa a manyinyani  sa tisize ‘mulatu’ o mutuna kwa lineku la hae.

“Ni lumela kuli babeleki ki bene ba ezize mafosisa. Neba swanela kuikopanya ni yo muhulu ili kuli ku konwe kufumaniwa tatululo. Nelu ikupezi maiswalelo kono musali nasa lati ku-utwa,” ne kubulezi Van Dyk.

Iita na hupula feela kuli babeleki ba Engen neba bata kumu uzweza kono kakuya ka Van Dyk, mazimumwangala ana konile kuswala lika kaufeela hane li ezahala na sika bona cwalo.

“Hani buleli kuli na ezize cwalo kuli a kone kufumana mashelen`I kuna, kono nto ye kaufeela kutuha ini kutela ni kuni eza bumaswe kakuli  batu baban`wi kutuha ba eza sina yena kuli ba kone kufumana mashelen`i ni bona.”

“Kelezo yaka kwa batu sihulu kwa batu baban`wi ba lipisinisi kiya kuli ba beye makamela maneku kaufeela ili kuli ha kuezahala simpangaliko sesi swana sina se, kuna ni bupaki sakata.”

“Mutu ni mutu u eza mafosisa kacwalo ki kokunde haiba kuli batu babeli inge ba bala mashelen`i kaufeela bona ka mita.”