OKAKARARA – Ewiliko lyOsekundosikola yedhina Waterberg Junior Secondary School olya ndopa okutopola oombete nomatalashe omape ngoka kwa li ga falwa kosikola ndjoka omvula ya zi ko, onkalo ndjoka ya thiminike aanasikola oyendji mosikola ndjoka mboka ye li momuhandjo opo ya ninge haya lala pomalupanda pwaa na omatalashe.  Osikola ndjoka yi li ookilometa heyali okuza mOkakarara, moka omu na aanasikola 350 mokati kawo ye li 280 ohaya kala momuhandjosikola.

Onkalo yi nyanyaleka moka tamu lumbu aanasikola momuhandjosikola oya holoka puuyelele mEtine oshiwike sha zi ko konima sho Kansela gOshikandjohogololo Okakarara, Vetaruhe Kandorozu  kwa li italele ko yemwene  koonkalo moka tamu lumbu aalongisikola oshowo aanasikola pOtjituuo, Okaepe, Waterberg nOkakarara. 

Pethimbo lyetalelopo lyoosikola dhayooloka, Kandorozu okwa li a ende pamwe naanambelewa yUuministeli wElongo oshowo mboka yUuministeli wIilonga nOndalasipota. Pethimbo lyokutala onkalo mosikola poWaterberg Junior Secondary School, oshifo shika osha koneke kutya aanasikola ye thike konyala pethele limwe momuhandjosikola kaye na oombete nomatalashe. Omakumbatha gawo okwa li ga yalwa pomalupanda gowala. Oshe ya wo puuyelele kutya etonatelo lyomihandjo dhaanasikola aamati naakadhona ka li po, molwaashoka aanasikola oyendji okwa li ashike ya lala omanga yakwawo ye li kootundi taya longwa. Sho aanasikola ya pulwa kutya omolwashike kaye li kootundi, yamwe oya ti kutya otaya ehama nonando aatonateli yomihandjo (matrons) inaya tseya ngele aanasikola mboka otaya ehamana  nenge inaya tseya sha kombinga yuuwehame wawo.

Ope na oondunda dhokupungula iinima dhi li mbali dhoka dha patwa dhi li popepi nekulo/okombitha, dhoka Kandorozu kwa li a gandja elombwelo kaatonateli opo dhi egululwe. Meni lyoongulu dhika omwa li oombete 50 oompe oshowo omatalashe omape ge li 90 ga londathana ga tsa mombanda.  Memboloka lyaamati, omu na epoto lyokandjugo lya teka, omanga pe na epoto epe inali longithwa li li mongulu yokupungula. Sho Kansela a pula kutya omolwashike aanona haya lala pomalupanda, omanga pe na oombete nomatalashe ihaga longithwa ge li moongulu dhokupungula, kape na ngoka kwa li ta vulu okugandja eyamukulo tali hokitha. Omukuluntusikola Eliah Nguarambuka okwiipatana kutya ke na ontseyo yasha yoombete nomatalashe omape ihaga longithwa ge li moongulu dhokupungula, ta ti kutya ye okwa tameke ashike iilonga omvula ndjika muFebuluali.

Omukuluntu gOmuhandjo, Bethuel Ndjiruete okwa zimine kutya oye e na oshinakugwanithwa shoka shokupungula omatalashe noombete dhoka, nonando okwa tseya kutya aanasikola ohaya lala pomalupanda. Kakele, okwa gandja ombedhi komukuluntu-tonateli gomuhandjo Fugenesia Tjikuua sho a ndopa okutopola omatalashe noombete kaanasikola konima sho kwa li ga mbesitelwa okuza kUuministeli wElongo omvula ya zi ko. “Ngame onda lombwela omukuluntu-tonateli gomuhandjo a topole oombete nomatalashe omvula ya zi ko, ihe ine shi ninga.

Nomvula ndjika onde mu lombwela ihe natango ine shi ninga,” osho Ndjiruete ta ti.  Tjikuua okwe shi zimine wo kutya okwa tseya kutya ope na oombete, omatalashe nepoto ya patelwa mongulu yokupungula.  “Tse katu na omalombwelo pambelewa okugandja oombete nomatalashe, molwaashoka aanona ohaya yaka po oombete nomatalashe,” osho a kambadhala okuyukipalitha okundopa kwe mushika.