BA Kansulu kapa mane katengo ka tolopo ya Katima Mulilo bese ba inzi likweli ze lishumi kaze talu (13) inge ba sina ‘mueteleli’ kapa mane yo muhulu wa kamaiso ya misebezi ya katengo ka tolopo seba konile kuamuhela mabizo a batu baba tabela ‘kuina’ fa sipula sesi tuna sani mwa mazazi a felile.

Mwa nako ya cwale, kansulu I etelezwi swalelele ki mutompehi Charles Nawa Nawa. Ya nali yo muhulu wa kansulu Dr Vincent Sanzita na konile kuamuhela pene ya hae ya penshini ye likana N$500 000 silimo se sifelile kasamulaho wa kulilimaniswa fa sipula sa hae ka nako ye telelele mane ni kushelana niba ketelelo ya kansulu mwa maluko a man`wi.

Sipula sa ‘kuetelela’ kansulu ya tolopo ya Katima Mulilo nesi kilwe sa bapazwa wa mitende ni kumema batu baba ikonela kuli ba kone kufitisa likupo za bona kono ne kusika bonahala palo ye pahami ya batu bene ba tabela ‘kuetelela’ kansulu yani, ili nto yene tisize kuli mane ba kansulu ba kone kubapaza kaza sipula sesi swana mitende lwa bubeli.

Kakuya ka Muina Situlo wa ketelelo ya kansulu, Kansela Charles Matengu, babeleki kaufeela ni makansela sina yena, bata siya musebezi kaufeela wa litatubo za musebezi kuli u konwe kupetiwa ki maofisa baba zwelela kwa Likolo leli bona za Likiliti ni Milonganyana ili kuli kusike kwaba ni silibonda mwa mungendenge kaufeela.

“Lika kaufeela lita etelelwa ki maofisa ba Likolo mi luna kaufeela luta talimela feela ni kuputa mazoho a luna ili kuli lika kaufeela li kone kuzamaya ka nzila yende ye sina ketululo,” ne kubulezi Matengu.

“Luna lu lapela feela kuli mutu ya ziba kupeta musebezi hande a konwe kumbalamaniswa mwa sipula mo,” na ekelize hape.
Na tiiselize kuli batu kaufeela baba tabela kuswala sipula sani bata bizwa kwa litatubo za musebezi kwa makalelo a kweli ye taha. Kakuya ka Matengu, batu ba supile kiba bata biziwa.

Matengu na talusize kuli tolopo ya Katima sina litolopo zen`wi ze nyinyani ina ni lisitataliso ze shelana hala zona mandu a sikai mwa tolopo mane ni kutokwa kwa mapaipi a mezi a kenile mwa libaka zabo naikahela.
“Selu beile malaiti mwa makulu mi hape selu kupile bayahi kutaha ni mabizo alu kona kufwa makulu kaufeela alu sweli mwa tolopo ya luna ye.”

Mwanako ya cwale kakuya ka Matengu, ba kansulu banze ba patehile ni kumateha hande kwa mikwakwa ya gilabelu.
“Halu ta feza luta beya tala mwa mikwakwa yen`wi ya tolopo.”

Kansela naize kuna ni lizwelopili zeta esha mwa tolopo mwa libiki ze taha hala zona mapurojekitisi aba Safland Namibia ata hatiswa ili mapurojekitisi ata bona kuyahiwa kwa masintolo a shelana shelana. Ba GIPF ni bona ba bata kuyaha muyaho tuna hamohocwalo niba MVA.

Matengu sa kupile babulukisi ba mashelen`i ni batu ba lipisinisi ze shelana kuli ba kone kukena mwa ngoma ni kuzwisezapili tolopo ya Katima Mulilo ili kuli bayahi ba kone kufumana misebezi.

Tolopo hape ita bona kuli libaka ze n`ata za maino a sicaba za keniswa hande mane ni kubeiwa mapaipi a mezi ni mutabani  kakuli kansulu ne konile kuamuhela pene ye likana N$2 million kwa Likolo la Likiliti ni Milonganyana.

“Kulekisa kwa mubu wa maino o sika keniswa hande mane ni kubeiwa limbule ze cwale ka mapaipi a mezi ni mutabani haki ko kunde kakuli lu tobelwa ki mashelen`i a man`ata ahulu kacwalo lu swanela kubona kuli lwa kenisa hande sibaka ni kulekisa ka pene ye bonahala hande.”

Caption (Matengu): Muina situlo wa ketelelo ya kansulu ya tolopo ya Katima Mulilo,  Kansela Charles Matengu.