BAANA ba silezi neba kilwe ba tamiwa biki ye felile kasamulaho wa kuakalezwa kuli neba kile ba uzwa likomu mwa lihola za busihu.

Nihaike palo kaufeela ya likomu zene konilwe kuuzwa hai sika zibahala kale, masholi neba fumanwi feela ni likomu ze ketalizoho zene pila kubeya ili n`wi yene bulailwe kale ki masholi mwa silalanda sa Okahandja.

Motikala yene longile limunanu ze ni yona se beilwe feela kwa siteshini sa mapokola mi mapokola neba konile kutama masholi ba kasamulaho wa kulumiwa zebe ki limembala za sicaba kakuya ka yo muhulu wa sipokola mwa sikiliti sa Otjozondjupa, Commissioner Joseph Anghuwo.

Mumatisi wa motikala kubeya batu bene ba bata kuleka likomu za busholi ze, ni bona neba tamilwe.

“Kuzona likomu ze kaufeela, ili n`wi ne bulaezwi mwa tolopo ya Okakarara haa zen`wi zona neli nze li matiswa ka mautu,” ne kuekelize Anghuwo hape.

Likomu neli uzwizwe kwa simu ye fumaneha mwa silalanda sa Okakarara ni Hamakari.
Mun`a simu na palezwi kuzibahaza palo ya likomu zene tondahala mwa simu ya habo.

Yo muhulu wa sipokola na kile a tiiseza kuli masholi nese ba matisa likomu ze ka lipelesa mane ni mautu haisi nako yeo yene ba konilwe kuswaliwa ki mapokola.

Anghuwo na sika patalaza mabizo a masholi mwa nako yene lu konile kupatalaza kaza lona likande le kakuli neba sika bonahala kale fa pila Khuta ya Muatuli.

“Teko ya zona limunanu ze hai sika patalazwa kale kono komu ili n`wi I kona kulekiwa ka pene ye fitelela N$5 000 ka kuitinga ka mubili wa yona,” ne kubulezi Anghuwo.