Mubihi ki: Michael Liswaniso
BINDUKU
BA KATENGO kaka bona za liketisa mwa naha seba tumusize lin'olisa la simubuso la kopano yenca ye zibahala ka National Democratic Party ka puo ya si yesi yesi. Yo muhulu wa katengo kaka bona za liketisa mwa naha mutompehi Philemon Kanime kiya na nitifalisize za lin'olisa la kopano yenca yeo simubuso maabani musihali hana ikopanyize ni mubihi yo ka muhala.
Sapili kopano nei zibahala ka Caprivi National Democratic Party, CNDP kabu kuswani kono, ka lona libaka tuna la libizo la pili leo, kopano nei hanezwi lin'olisa kiba katengo ka liketisa mi nenze I talimani ni matata a lin'olisa la simubuso, haisi mwa libiki ze felile kona I n'oliswa simubuso kiba katengo tuna kona kaka bona za liketisa mwa naha kasa mulaho waku cinca libizo la yona leo.
Kopano nei tabela ku itenga mwa liketisa za pili za milonganyana kono ka libizo tuna la yona kopana la pili, kopano nei sika itenga mwa liketisa sina hane I hanezwi lin'olisa la simubuso. Mwa nako ya cwale kopano sina hase I zibahala ka National Democratic Party se taitenga mwa liketisa za bueteleli ni limembala zen'wi za mwa ndu ya milao ze swanela ku tateka mwa kweli ya Njimwana ye taha silimo se.
Ba mutende o wa New Era sina hane ba ikopanyize ni yo muhulu wa ba katengo kaka bona za liketisa mwa naha yena mutompehi Philemon Kanime maabani musihali, Kanime na talusize kuli, kopano nei n'olisizwe kale simubuso libiki ze peli ze felile kasa mulaho waku utwisisa handende foku sweu kuli libizo la yona kopano nei sa yahisi hande naha ye, ili libizo leo Kanime na supile kuli neli yahulula sina kamo neku ezahalezi sapili mwa sikiliti sa Kapilibi (Caprivi).
Kakuya ka mutompehi Kanime libizo la kopano la pili neli utwahala ahulu kuli neli libizo lene li hatisisa ahulu ili leo hape neli lumelelana ni mulelo tuna waku puma sikiliti sa Kapilibi fahali.
Ba katengo kaka bona za liketisa hamoho cwalo ni Kanime neba kile ba hatelela feela kuli kopano nei swanela ku zwisa libizo la Kapilibi kwa teni ni ku beya libizo leo ba talusa kuli li utwahala hande ili leo leli sa abi mishobo ni likiliti fahali kono ili libizo leli yaha naha kaufeela.
Mwa likweli zakwa mulaho pili kopano I sika cinca kale libizo la yona nei kile ya lika kui n'olisa simubuso kuli ni yona ibe yen'wi ya likopano za lipolitiki zene itengile mwa liketisa za milonganyana kono ka libaka tuna la libizo la yona, kopano nei sika fiwa sibaka saku eza cwalo ka libaka tuna lona la libizo la yona la pili.
Kopano I etelezwi ki mutompehi Martin Lukato yo sapili neili mupolisa ya cilaukile ahulu mwa ngana ni zibo ya mulao.
Mwa linako ze felilemutompehi Lukato na kile a taluseza ba mutende o kuli lin'olisa la kopano ya hae simubuso neli nze li pala sina ba katengo kaka bona za liketisa hanenze ba hatelezi feela kuli kopano I cince libizo la yona lene li kulubelwa kuli ki libizo lene li nanula ahulu mulelo waku puma sikiliti.
Sapili Lukato hape naize taba yaku hanela kopano ya hae lin'olisa nenze i mu utwisa ahulu pilu butuku mi na tabela ku bona mulao unze u bapala kalulo sina yena hana sa ikopanyize kale ni muyemeli wa hae wa mulao yena mutompehi Patrick Kauta ni ku mu luma zebe kaza taba tuna yeo.
Isali mwa likweli zakwa mulaho hape, muyemeli yo mun'wi wa mulao yana kupile kusa zibahaza libizo la hae, na taluselize ba kolanta ya makande ye kuli "libizo haki taba tuna yaku hanela lin'olisa kwa kopano ya lipolitiki ifi kamba ifi".
Lukato nasa kile a ikopanya kale ni ba likhuta za sizo mwa sikiliti sa habo sona sa Kapilibi mi neba bonisize hande foku sweu kuli nenze batabelana ni mihupulo ya hae yena mutompehi Lukato.
Zeo ni halili cwalo mutompehi Lukato nasa kile a lumeleza kale lika kamukana ze tokwahala haiba kopano ifi kamba ifi ya lipolitiki I tokwa lin'olisa simubuso. Zene se lumelelizwe kale kuba katengo ka liketisa sapili ki; pene nyana ya mashilin'I a likana N$ 5 000, mutomupuso wa kopano hamoho cwalo ni linyatelo ze miyandanda za limembala za kopano sina kamo ku swanelela kono, ba katengo ka liketisa bona neba kile ba talusa feela kuli "batili kopano nei swanela ku cinca libizo la yona" sapili, kona ita n'oliswa simubuso.
Yo muhulu waba katengo kaka bona za liketisa yena mutompehi Kanime nai tumelelezi fo ku sweu kuli na amuhezi lika kaufeela zene lumelelizwe ki Lukato sapili kono, na bulezi hape kuli kopano nei lyanganisize feela nto ilin'wi ili ya libizo la yona sapili mi ka kuya ka Kanime ki libizo leli ezizwe hande ahulu sina hase li cincizwe sina naha Namibia haili naha ilin'wi ye swanela ku swalisana hamoho ku sina lipangaliko za mishobo mane ni zen'wi ze sa yahisi hande.
Kanime na ekelize kutalusa kuli yena niba katengo ka habo neba sina mulelo waku hatelela kapa ku sinya sinya milelo ya kopano yenca kono, bona seo neba tabela feela ku bona ki seo sese si ezahezi cwale cwale ili nto ye bupa silikani ni sizwale sakata hala likopano za lipolitiki kamukana.
Lukato u lela ku zwisezapili sikiliti sa habo haiba a beiwa mwa mata kapa mane ku wina lipula zen'wi ili ze n'ata mwa ndu ya milao kono zeo kaufeela likona feela ku ezahala haiba kopano ya habo I swalisana hande sina hase ifilwe kale sibaka ni sipula simubuso, mi itaba yen'wi ya likpano zeta yema mwa liketisa za bueteleli ni limembala zen'wi za ndu ya milao ze tateka kweli ye taha, ka kuya ka Lukato.
Lukato hape u lela ku lilimanisa lipangaliko zabu hateleli ni miyobo mwa sikiliti sa habo hamoho cwalo ni zen'wi zeo a bona kuli lisinya sinya zwelopili ni kozo sakata mwa sikiliti.
Mueteleli wa kopano yenca hape u lela ku biza babulukisi ba mashilin'I mwa sikiliti sa habo ni ku lika ahulu ku lilimanisa lipangaliko za bubangoki zese atile ahulu mwa sikiliti sa habo sina yena haneli mupolisa yana ni ngana hamoho cwalo ni zibo mwa limpangaliko ze cwalo.
Kopano I etelezwi ki yena Lukato, mi u latelelwa ki mutompehi Fredius Bulunzi yeili Mueteleli yo munyinyani/mubakweli wa hae. Sikwama sona si bonwa ki mutompehi B.K Lielelo ha mutompehi Event Linyando yena ki mun'oli yo muhulu wa kopano. Mutompehi Borniface Libanda u bona za litaba, lipatalazo hamoho cwalo ni zibahazo ya kopano kwa sicaba, mufumahali Clarrinah Likokoto yena u bona za silikani ni swalisano sakata ya limembala ni baza-maisi/baeteleli ba kopano.
Maabani musihali, mubihi yo na palezwi ku ikopanya ni mutompehi Martin Lukato ka muhala ku utwa za milelo ya hae ye min'wi ye minca, sina kopano hase I filwe kale sibaka simubuso saku itenga mwa liketisa za naha sihulu za bueteleli ni limembala za ndu ya milao ze tateka kweli ye taha.